C/aahi Yusuf oo ka dhoofeyMuqdisho kuna sii jeeda Addis Abba, duqeyn loo gaystey Garoonka

Khamiis 12/06/08  Codkanabadda Boosaaso

Ugu yaraan 9-qof ayaa ku dhintay 13 kalena waxaa gaaray dhaawacyo kala duwan kaddib markii dagaallo ay ka qarxeen waddada Maka Al-mukaramah oo ay xireen ciidamo ka tirsan kuwa DF iyo kuwa Ethiopia.

Madafiic ayaa lagu garacay Garonka Muqdisho xilli uu halkaas ku sugnaa Madaxweyne Yuusuf oo damacsanaa inuu diyaaraddii qaadi lahayd raaco, balse lama sheegin khasaare ka dhashay garoonka Adan Adde gudihiisa.

Afhayeen u hadlay Madaxweynaha Somalia ayaa u sheegay saxaafada inaysan jirin wax khasaare ah oo ay geysteen dagaalladii dhacay, ayna u badnaayeen rabashaduhu kuwo madaafiic ah.

"Madaxweynuhu, wuxuu u dhoofay dalka Ethiopia, halkaasoo uu kaga qaybgeli doono shirka dalalka ku bahoobay Urur Goboleedka IGAD oo ka furmaya Addis Ababa" ayuu yiri Afhayeenka Madaxweyne Yuusuf.

Dagaalkii dhacay ayaa u dhexeeyay ciidamada Amisom ee saldhigyada ku leh Isgoyska KM4, kuwo Ethiopian ah iyo kuwa Somalia oo saakay xiray waddada isku xirta Villa Somalia iyo Garoonka Aadan Cadde iyo weliba kooxaha dagaallada ka wada Muqdisho.

Goobjoogayaal ayaa waxay sheegeen in madaafiic ku dhacday xaafado ka tirsan Degmada Hodan ay ku dhinteen 6-da ruux halka ay ku dhaawacmeen tiro kale oo aad u fara badan; waxayna sheegeen inay madaafiicdu ka imaanaysa dhanka ciidamada Uganda ee ku sugan KM4.

Howlwadeennada Isbitaalka Madiina ayaa waxay u xaqiijiyeen Garowe Online, in la gaarsiiyay 13-dhaawac ah, kuwaasoo ay ku jiraan saddex ka tirsan Askarta Dowladda.

Captain Be-huko Bridgye oo saxaafaddu ay wax ka weydiisay dagaalkii saakay lagu qaaday ciidamadooda ku sugan KM4 ayaa sheegay inaysan jirin wax khasare ah oo kasoo gaaray ciidamdooda, wuxuuna inkaray inay ciidamadoodu ku jawaabeen hubka culus.

Afhayenka Amisom, wuxuu qiray inay jireen gantaallo ku dhacay Garoonka Adan Adde, balse aysan wax khasaare ah geysan, isagoo sheegay in Madaxweyne Yuusuf uu si nabad ah ku duulay.

Kooxaha mucaradka ah ayaa inta badan dagaalo la beegsada Madaxweynaha Somalia marka uu ka baxayo Garoonka iyo marka uu ku soo noqnayo magaalo madaxda.

Dagaalkaan ayaa noqonaya kii 2-aad oo ka dhaca Muqdsiho muddo 24-saac gudahood ah, iyadoo dhawaan heshiisyo ay ku kala saxiixdeen mucaaradka iyo DF dalka Jabuuti.

Madaxweynaha ayaa sidoo kale la sheegaya in uu Sucudiga tagi doono halkaas oo la sheegayo in lagu sixiixi doono heshiiskii lagu gaarey Jabuuti.