Sabti  14/06/08  Codkanabadda Boosaaso

Madaxweynaha Dowladda Somalia C/laahi Yuusuf Axmed iyo R/wasaaraha Ethiopia Meles Zenawi, ayaa kulan muhiim ah ka yeeshay arimaha Somalia iyo marxalidihii ugu dambeeyey.

Ilo xog ogaal ah oo aanu ka helnay Magaalada Addis-Ababa ayaa sheegaya in Madaxweyne Yuusuf uu warbixin kooban ka siiyey Meles Zenawi xaaladihii ugu dambeeyey ee Somalia

Madaxweynaha Somalia, oo sidoo kale uga mahad-celiyey R/wasaare Meles taageerada Militari ee had iyo jeer ay Ethiopia la garan taagan tahay Dowladda KMG, ayaa sheegay in ay ciidamada Ethiopia iyo Somalia dagaal adag kula jiraan kooxo ka soo horjeeda Amaan kusoo dabaalidda Somalia sida uu hadalka u dhigay.

Md. C/laahi Yuusuf ayaa sidoo kale soo hadal qaaday weeraro lugu qaaday markii uu ka soo baxayey Magaalada Muqdisho oo ay ugu dambeysay safarkiisan uu ku joogo Addis Ababa, isagoona ka dalbaday Meles in Ethiopia ay taageero dheeraad ah siiso Dowladda KMG.

Dhinaca kale R/wasaaraha Ethiopia ayaa u ballan-qaaday Madaxweynaha Somalia inay Ethiopia sii wadi doonto gacanta militari ee ay siiso Dowladda, islamarkaana ay ka go'an tahay soo afjaridda mushkiladaha Somalia, isagoo sidoo kalena qeexay in Ethiopia ay tababar Militari siin doonto Ciidamada Somalia si ay ammaanka wadanka u hantaan